Yozgi issiqda dorilarni qanday saqlash kerak: 6 muhim qoida

Salomatlik · 06.07.2026

Yozda harorat 40°C ga chiqqanda dorilar ham "qiynaladi". Ko'pchilik dori vositalari uchun ishlab chiqaruvchi 25°C dan past haroratni talab qiladi — undan yuqorida ta'sir etuvchi modda parchalana boshlashi, dori kuchsizlanishi yoki hatto zararli bo'lishi mumkin.

1. Qadoqdagi yozuvni o'qing. Har bir dorining varaqasida "Условия хранения / Saqlash sharti" bandi bor. "25°C dan past", "2–8°C (muzlatkichda)" kabi ko'rsatmalarga qat'iy amal qiling.

2. Hammom va oshxonada saqlamang. Bu xonalarda harorat va namlik keskin o'zgaradi. Eng yaxshi joy — quruq, salqin, quyosh tushmaydigan shkaf.

3. Mashinada qoldirmang. Yozda yopiq avtomobil ichida harorat 60–70°C ga yetadi. Torpedoda unutilgan dori bir necha soatda yaroqsiz bo'ladi.

4. Muzlatkich talab qiladigan dorilar. Insulin, ba'zi ko'z tomchilari, vaksinalar va sham (suppozitoriy)lar 2–8°C da saqlanadi. Yo'lga chiqsangiz — termosumka ishlating.

5. Rangi yoki hidi o'zgargan dorini ishlatmang. Tabletka dog' bo'lib qolgan, sirop loyqalangan yoki malham ajralib ketgan bo'lsa — muddati tugamagan bo'lsa ham, undan voz keching.

6. Yaroqlilik muddatini tekshiring. Issiq sharoitda muddat oxiriga yaqin dorilar ayniqsa tez buziladi.

Eslatma: bu maslahatlar umumiy ma'lumot uchun. Muayyan dori bo'yicha savolingiz bo'lsa, shifokor yoki farmatsevt bilan maslahatlashing.